1Ti 6 | NdeIBE | STEP | Bonke abangaphansi kwejogwe lobugqili kumele bakhangele amakhosi abo ngokuthi afanele ukuhlonitshwa, ukuze ibizo likaNkulunkulu kanye lokufundisa kwethu kungachothozwa.

1 Timothy 6

1 Bonke abangaphansi kwejogwe lobugqili kumele bakhangele amakhosi abo ngokuthi afanele ukuhlonitshwa, ukuze ibizo likaNkulunkulu kanye lokufundisa kwethu kungachothozwa.

2 Labo abalamakhosi akholwayo kabangawadeleli ngoba angabazalwane. Kodwa kabawasebenzele ngcono kakhulu, ngoba labo abasizakala ngokubasebenzela kwabo ngabakholwayo, labathandekayo kubo. Lezi yizinto okumele uzifundise njalo ugcizelele kuzo.

Ukuthanda imali

3 Uma umuntu efundisa imfundiso yamanga njalo engawuvumi umlayo oqotho weNkosi yethu uJesu Khristu lemfundiso yokwesaba uNkulunkulu, 4 uyazikhukhumeza njalo akulalutho aluzwisisayo. Ulezifiso ezimbi enkanini lasekuphikisaneni ngamazwi, okudala umona, lombango, lezinkulumo ezilimazayo, ukucabangelana okubi 5 kanye lokuxabana kokuphela kwabantu abalengqondo ezixhwalileyo, asebelahlekelwa liqiniso abacabanga ukuthi ukulalela uNkulunkulu kuyindlela yokuzuza imali.

6 Kodwa-ke ukulalela uNkulunkulu ngokusuthiseka kuyinzuzo enkulu.

7 Ngoba akulalutho esalulethayo emhlabeni, njalo akulalutho esingasuka lalo kuwo. 8 Kodwa uma silokudla lezigqoko kumele sisuthiseke ngalokho. 9 Abantu abafuna ukunotha bawela ezilingweni lasemijibileni lasezinkanukweni ezinengi zobuthutha ezilimazayo eziwisela abantu ekufeni lasekubhujisweni. 10 Ngoba ukuthanda imali kuyimpande yezinhlobo zonke zobubi. Abanye abantu, ngokutshisekela imali, baphambuka ekukholweni bazibangele izinsizi ezinengi.

UPhawuli ulaya uThimothi

11 Kodwa wena, muntu kaNkulunkulu, kubalekele konke lokhu, ufune ukulunga, lokulalela uNkulunkulu, lokukholwa, lothando, lokubekezela kanye lobumnene. 12 Lwana ukulwa okuhle kokukholwa. Bambelela ekuphileni okulaphakade owabizelwa kukho ekuvumeni kwakho okuhle owakwenza kulabofakazi abanengi. 13 Phambi kukaNkulunkulu, onika izinto zonke ukuphila, laphambi kukaKhristu uJesu, owathi efakaza phambi kukaPhontiyu Philathu, wenza ukuvuma okuhle, ngiyakulaya 14 ukuba ugcine umlayo lo kungekho sici loba ukusoleka kuze kube sekubonakaleni kweNkosi yethu uJesu Khristu, 15 okuzalethwa nguNkulunkulu ngesikhathi sakhe – uNkulunkulu obusisekileyo njalo onguyena Mbusi kuphela, iNkosi yamakhosi loMbusi wababusi, 16 onguye kuphela ongafiyo lohlala ekukhanyeni okungafinyelelekiyo, okungekho owake wambona loba ongambona. Udumo lamandla akube kuye kuze kube laphakade. Ameni.

17 Balaye labo abanothileyo kulo umhlaba wakhathesi ukuba bangazikhukhumezi loba babeke ithemba labo enothweni engathembekanga, kodwa ukuba babeke ithemba labo kuNkulunkulu, osinika kakhulu konke okwentokozo yethu.

18 Balaye ukuba benze okuhle, bande ngezenzo ezinhle, baphane njalo bathande ukwaba okungokwabo.

19 Ngalokhu bazazibekela inotho njengesisekelo esiqinileyo sesizukulwana esizayo ukuze babambe ukuphila okuyikuphila okuqotho.

20 Thimothi, londoloza lokho okuphathisiweyo. Xwaya izinkulumo zokweyisa uNkulunkulu lokumelana lalokho okuqanjwa amanga kuthiwa yikwazi, 21 abanye asebekuvumile njalo okuthe ngokwenza njalo baphambuka ekukholweni. Umusa kawube kuwe.